每年兩會，前總理李鵬的千金李小琳，一身行頭總是吸引到大量傳媒的鏡頭。據說，佢曾經穿過一件滿佈Gucci monogram的大褸現身，又試過戴龍眼咁大粒嘅珍珠耳環出場，仲要唔覺意跌咗，最後係香港記者主動幫佢執番，其揮金如土的霸氣，實在係令人動容。

不過今年，琳琳姐要令千千萬萬想欣賞佢時尚品味嘅網友們失望喇！皆因佢居然拎咗個環保袋去兩會，仲要無晒啲粗頸鏈、巨耳環，只穿簡單西裝外套。早前市傳李鵬一家疑似受查，李小琳想低調，可以理解，不過一時間由周身名牌變為拎環保袋，海迪覺得刻意咗少少噃。

上述呢啲高官巨賈「忽然樸素」的場面，過去一年其實見唔少。有外資高檔百貨公司管理層曾經講過，點睇得出內地消費市場唔掂？只要同高官食飯就知道。一枱十幾人，居然冇一個人有戴錶。其實反貪同限制公費的情況，影響唔局限於奢侈品，有國企今年連印日曆派比客都唔得，就連平時擺喺office招呼客人的糖果，都cut咗最貴嗰隻。所以點止百貨公司受影響？實情係超市，甚至連旺旺（151）啲大禮包，都會因為咁而賣少咗。

瑞銀早前發表報告，就估企業向政府送禮的消費，佔中國奢侈品銷售比重達50%。有業內人士和海迪講，呢個估計其實算係保守㖭。這場反貪風暴，可見將來都見唔到盡頭。